حمزہ شہباز کا وعدہ اور ون ٹو تھری

ڈاکٹر محمد اجمل نیازی ـ

حمزہ شہباز نے این اے ون ٹو تھری سے الیکشن جیتنے کے بعد اعلان کیا کہ وہ اس حلقے کے لوگوں کو وفا کا صلہ دیں گے یہ غریب عاشق ہیں، کئی بار وفا کا مظاہرہ کر چکے ہیں۔ یہ حلقہ نوازشریف کا علاقہ سمجھا جاتا ہے وہ جیتے اور پھر جاوید ہاشمی دو بار جیتے ایک بار تو وہ جیل میں تھے اب پرویز ملک جیت گئے ہیں کسی کو بھی ٹکٹ ملتا تو وہ جیت جاتا۔ وفا کے باوجود لوگ ابتلا میں مبتلا ہیں زندگی کی شرمندگی کا عذاب جھیل رہے ہیں، زندگی درندگی کا شکار ہے ایک عذاب مسلسل طاری ہے اور جاری و ساری ہے۔ یہ کیا لوگ ہیں کہ پہلی وفاوں کا صلہ نہیں ملا تو بھی امید لگائے ہوئے ہیں اور صرف شریف فیملی سے امید لگائے ہوئے ہیں۔ جیت کے یقین کے باوجود میاں نواز شریف نے تقریر کی۔ یہ ایک بڑا جلسہ تھا۔ خواجہ سعد رفیق ن لیگ کا ایک اچھا مقرر ہے نوازشریف کے جلسے میں بجلی چوری کے الزام پر میڈیا کے سامنے صرف وہی ٹھہر سکتا تھا یہ انتخابی مہم حمزہ شہباز کی قیادت میں لڑی گئی۔ اس نے اپنی آنکھوں سے دیکھا ہے کہ یہاں ان کے ووٹرز کس حال میں ہیں وہ بدحال ہیں اور بے حال بھی ہیں۔ سیوریج سسٹم برباد ہو چکا ہے، گندگی کے ڈھیر لگے ہوتے ہیں، گندگی اور بندگی رل مل گئی ہیں سڑکیں ٹوٹے ہوئے دلوں کی طرح پڑی ہیں۔ ٹرانسپورٹ نہیں ہے کہ گاڑیاں کن راستوں پر چلیں راستے ہی نہیں ہیں۔ مگر منزلیں ہیں کہ ان کا مقام دل میں ہے دل ٹوٹا ہوا ہو تو بھی امیدوں اور آرزوں سے بھرا رہتا ہے۔
مقابلہ شروع ہونے والا ہو تو ون ٹو تھری کہتے ہیں اس حلقہ انتخاب کا نام ہی ون ٹو تھری ہے۔ ون ٹو تھری میں حمزہ شہباز مقابلہ جیت چکے ہیں۔ اب اس جیت میں جتوانے والوں کو بھی حصہ دار بنایا جائے اس پسماندہ محروم برباد، بدقسمت علاقے کو لاہور کا حصہ بنایا جائے۔ یہاں رہنے والے لاہور کے شہری نہیں لگتے۔ حمزہ شہباز نے کہا ہے کہ وہ یہاں کام کی خود نگرانی کرے گا۔ اس نے جیتنے سے پہلے وعدہ نہیں کیا جیتنے کے بعد کیا ہے تو لگتا ہے کہ روایتی سیاستدان والا وعدہ نہیں ہے وہ ابھی سیاستدان نہیں بنا البتہ مفاد پرست مستقل خوشامدیوں کے گھیرے میں خطرہ ہے کہ وہ ابھی سے اپنے آپ کو حکمران سمجھنے لگ جائے اس سے شکایت ہے کہ وہ مقرر رہے یہ تو اس کا خاندانی ورثہ ہے وہ موروثی سیاست کے دائرے میں ہے۔ یہ دائرہ تنگ نہیں ہونا چاہئے وہ جب دائرہ توڑ کر نکلے گا تو بات بنے گی لوگ اسے ابھی سے کراون پرنس بنانے لگے ہیں۔ وزیراعلیٰ بن جانے سے کوئی مقام نہیں مل جاتا، وراثت میں پراپرٹی کی طرح پارٹی کو استعمال کرنے والے کبھی تاریخ میں زندہ نہیں رہتے۔ اس کے لئے موقع ہے کہ حلقہ 123 کو ایک ترقی یافتہ بستی بنا دے۔ وہ اسے گلبرگ بنانا چاہتا ہے گلبرگ بھی اب اس قابل ہے کہ اسے کوئی اور علاقہ بنایا جائے یہ بات ایسے ہی ہے کہ نالائق سیاستدانوں نے کئی بار لاہور کو پیرس بنانے کی بڑھک ماری ہے لاہور کو لاہور بناو کبھی یہ شہر شہروں کا سردار ہوتا تھا اب یہ غلاموں کی بستی ہے۔ بڑے غلام اپنے آپ کو چھوٹے غلاموں کا آقا سمجھتے ہیں، چھوٹے غلام کیا کریں ان کا کام نعرہ مارنا ووٹ دینا اور وفا کئے چلے جانا ہے۔ خواجہ سعد رفیق نے 123 میں بہت سرگرمی دکھائی ہے اس نے مجھے بتایا کہ یہاں ایک ارب کا کام ہوا ہے مگر وہ نظر نہیں آرہا ہم اپنی کمٹمنٹ پوری کریں گے اور یہاں کے لوگوں کو مایوس نہیں کریں گے۔ حمزہ شہباز کے علاوہ وہی تھا ۔ خواجہ صاحب کے ساتھ مسلم لیگ ن کے کئی سرکردہ لوگ پرسنلٹی کلیش محسوس کرتے ہیں۔ وہ ابھی تک پارٹی والوں کے لئے جاوید ہاشمی نہیں بنایا گیا ایسے لوگ کسی سیاسی جماعت کا اثاثہ ہوتے ہیں مگر پارٹی لیڈر سب کو اپنی پراپرٹی سمجھتے ہیں۔ حمزہ شہباز اپنے آپ کو ایک مختلف آدمی ثابت کرے۔ وہ سیاستدان نہ بنے لیڈر بنے۔ لیڈر بننے کے لئے جو کچھ چاہیے وہ ابھی حمزہ کے پاس نہیں ہے مگر اس کے ارادے اور وعدے سن کر لگتا ہے کہ وہ کچھ کرنا چاہتا ہے، کچھ بننا چاہتا ہے۔ حلقہ 123 میں اس کی کارکردگی قابل تعریف ہے اب اس کے بعد اصل مرحلہ آیا ہے اللہ کرے وہ سرخرو ہو اور سرشار بھی ہو کیا اسے پتہ ہے کہ سرشار ہونا کیا ہے؟ وہ اس علاقے کو دیکھنے کے قابل بنائے جہاں شالامار باغ ہے اور برسوں بعد بھی لوگ اسے دیکھنے آتے ہیں اور وہ حکمران بھی یاد آتا ہے جس نے یہ باغ بنوایا تھا۔ اس علاقے کو باغ و بہار کر کے حمزہ شہباز لوگوں کے دل جیت سکتا ہے اور یہ الیکشن جیتنے سے بڑی کامیابی ہے۔ پرویز ملک اس علاقے کا نمائندہ ہے وہ یہ دل سے مانتا ہے کہ اس کی کامیابی میں حمزہ شہباز کی کوششوں کا بڑا دخل ہے۔ پچھلی بار بھی پرویز ملک اسی ٹکٹ پر جیتے تھے۔ اسے کہتے ہیں ایک ٹکٹ میں دو دو مزے درمیان میں ایک بار اسے ٹکٹ نہ ملا تھا کہ وہ ملک قیوم کا بھائی ہے۔ اس ٹکٹ کے لئے پرویز ملک نے ثابت کیا ہوگا کہ وہ ملک قیوم کا برادر یوسف ہے اس کے ایک بھائی ڈاکٹر جاوید اکرم علامہ اقبال میڈیکل کالج کے پرنسپل ہیں وہ بڑے آدمی ہیں ان کی وجہ سے میڈیکل کالج اور جناح ہسپتال کا نیا زمانہ شروع ہوا ہے شاید لوگوں کو معلوم نہیں کہ پرویز ملک ڈاکٹر جاوید اکرم کا بھائی ہے ورنہ اس کے ووٹ کم از کم 50 ہزار تو ہوتے یہ بات اگر ان کو بُری نہ لگے تو میں کہوں کہ ان کی اہلیہ بھابھی شائستہ پرویز زیادہ اہل عورت ہے کبھی کبھی لگتا ہے کہ اہلیہ اہل سے ہے وہ اپنی اہلیہ کو اپنے ساتھ ساتھ رکھیں۔ یہ بھی سوچیں کہ پہلے وہ جیتے تھے تو ان کے ووٹ کچھ زیادہ تھے یہاں سے جاوید ہاشمی نے 67 ہزار ووٹ لئے تھے۔ ٹرن آوٹ بھی کم رہا ، 80 ہزار لوگوں نے ووٹ نہیں دیا تو ان کا نمائندہ کون ہے۔ اپنے حلقہ انتخاب کے لئے وہ بھی کچھ کریں مگر کچھ نہ کرنے کے باوجود وہ دوبارہ جیت گئے ہیں تو خواہ مخواہ پریشان ہونے کی کیا ضرورت ہے کچھ نہ کچھ کرنے کے لئے اب حمزہ شہباز جو ہیں!

ڈاکٹر محمد اجمل نیازی
مظفر محمد علی نے بہت اچھی کہانیاں لکھی ہیں، ایک کہانی کا عنوان ہے ”قسطوں میں موت“ وہ قسطوں میں مرتا رہا، وہ زندہ آدمی تھا، زندگی کو کوئی اور زندگی بنانے کی آرزو اور ارادہ اس کے اندر مچلتا رہتا تھا، وہ مر مر کے جیتا رہا اور جی جی کے مرتا رہا۔ ہم سب قسطوں میں مر رہے ہیں۔ ایڑیاں رگڑ رگڑ کے کڑھ کڑھ کے، سڑ سڑ کے، مر مر کے جیتے ہوئے مر رہے ہیں۔ چاروں طرف سے کئی قسموں، رنگوں کی موت ہم پر جھپٹتی ہے اور جھپٹتی ہی رہتی ہے۔ زندگی اور موت دونوں ہمیں شکار کر رہی ہیں۔ مرزا غالب نے کہا تھا….
ہو چکیں غالب بلائیں سب تمام
ایک مرگ ناگہانی اور ہے
ہم پر بلائیں تمام ہی تو نہیں ہوتیں، کام تمام ہو جاتا تو کام بن جاتا، امیدوار ناامیدی کے درمیان رہتے رہتے تھک گئے ہیں، اَک گئے ہیں۔ میں مظفر محمد علی کے آخری دنوں کا گواہ ہوں اور یہ گواہی مجھے چین نہیں لینے دیتی۔ کیا بندہ تھا وہ اور کس طرح زندگی گزار کے گیا اس کا آغاز کتنا شاندار تھا اور اختتام تو انجام سے بھی تکلیف دہ تھا۔ اس نے بڑی تکلیفیں سہیں، بے بسی اور کسمپرسی کی انتہا اس پر ٹوٹ پڑی تھی۔ مرگ ناگہانی تو ایک تہمت ہے، اچانک خاتمہ تو خوش قسمت آدمیوں کے نصیب میں ہوتا ہے۔ جو آدمی اپنے آپ کو مرتا ہوا دیکھتا ہے، لمحہ لمحہ موت کی طرف جاتے ہوئے رک نہیں سکتا کچھ دیر کے لئے بظاہر یہ حرکت رک جائے تو زیادہ دکھ دینے والی ہوتی ہے۔ میری طرح وہ بھی اس صلیب سے لٹکتا رہا جو ہمیں نظر نہیں آتی۔ دو مقام دل والوں کو بہت محبوب ہیں۔ کوئے بازار اور سوئے دار۔ ہم نے خیالوں خیالوں میں ان مقامات کی بہت سیر کی مگر ہم بے مقام ہی رہے۔
میں کسی دوست اور پیارے کا آخری دیدار نہیں کر سکتا، میں نے کسی مرحوم کا منہ کبھی نہیں دیکھا، مجھ سے تو کسی زیادہ بیمار آدمی کی عیادت نہیں ہو سکتی۔ وہ بہت اچھا آدمی تھا۔ سنبھلی ہوئی شخصیت والا دردوگداز سے بھرا ہوا۔ مجھے لگتا ہے کہ کوئی راز بھی اس کے پاس تھا وہ اس کوشش میں رہا کہ کسی کو اپنا ہمراز بنائے مگر شاید وہ راز اپنے ساتھ لے گیا ہے، ہر شخص کے پاس کوئی نہ کوئی راز ہوتا ہے اکثر تو اس راز سے بے خبر رہتے ہیں انہیں بے خبری کے راز کا بھی پتہ نہیں چلتا۔ اب تو یہ بے خبری رہی اور نہ کوئی راز کسی کے پاس ہے اب ہر کوئی باخبر ہونا چاہتا ہے اور ذلیل و خوار ہو رہا ہے زیادہ تر ذلت کو تہمت سمجھ بیٹھے ہیں۔ سوہنی زندگی کا کوئی تصور کسی کے پاس نہیں تو وہ سوہنی موت سے کس طرح آشنا ہو سکتا ہے۔ مظفر محمد علی کو سوہنی زندگی نہ ملی مگر سوہنی زندگی کے خواب اور خیال تو اس کے پاس تھے جس کے پاس زندگی کو کوئی اور زندگی بنانے کی آرزو ہوتی ہے وہی اس زندگی کے لئے ترستا رہتا ہے اور پھر سوہنی موت بھی اس کا مقدر نہیں بنتی۔ وہ ایک عام سی آسان زندگی کے لئے ہم سب کی طرح جدوجہد کرتا رہا۔ اس نے کچھ ایسا تو نہ کیا تھا کہ اسے دیکھ کر اس کے دوست بھی غمزدہ ہو جاتے تھے۔ جس دن میں نے اس کے لئے کالم لکھا کہ حکمران اور لوگ اس کی زندگی بچانے کے لئے مدد کریں تو میں اپنے اندر ایک بار پھر مر گیا تھا۔ میں نجانے کتنی بار اس طرح مرا ہوں۔ اس کے گردے فیل ہو گئے تھے اس سے پہلے وہ خود بھی فیل ہو گیا تھا۔ فیل تو ہم سب ہو چکے ہیں۔ میں اسے ملنے نہ گیا تھا۔ میرا حال کون جان سکتا ہے کہ میں اس کے ساتھ ملنے کے لئے بے تاب تھا پھر اچانک دو دوستوں کی مدد سے وہ برادرم رحمت علی رازی کے دفتر پہنچا تھا۔ میں اچانک رازی صاحب کے پاس گیا ہوا تھا ہم تینوں دیر تک باتیں کرتے رہے اور کوئی بات نہ کر سکے پھر وہ مر گیا اور مجھے پتہ ہی نہ چل سکا یہاں دوستوں کے لئے ہی ایک دوسرے کی خبر نہیں ہوتی، کسی نے فون بھی نہ کیا۔ اخبار میں آیا ہو گا مگر دو سطری خبر پر نظر نہ پڑی۔
مجید امجد یاد آتا ہے کتنا بڑا شاعر تھا ایک چھوٹے سے کمرے میں اس نے پوری زندگی کو دیکھا تھا نہ اس کے جینے کا پتہ چلا نہ مرنے کا پتہ چلا۔ وہ بیش بہا آدمی تھا اس کے لئے استاد محترم ڈاکٹر خواجہ زکریا نے کام کیا ہے ہم اسے پڑھتے ہیں اور اپنے آپ کو داد دیتے ہیں کہ یہی لکھنے والے کی اصل بڑائی ہے کئی برسوں سے مظفر کا پتہ نہ تھا کہ وہ ہے اور وہ نہیں ہے تو اس کی بھی کسی کو خبر نہیں ہے ….
میں روز ادھر سے گزرتا ہوں کون دیکھتا ہے
میں جب ادھر سے نہ گزروںگا کون دیکھے گا
میری بہن، بھابھی، بیگم مظفر علی سے بات ہوئی تو انہوں نے بتایا کہ میں نے بچوں سے کہا تھا اجمل نیازی کو بتاو¿ شاید انہوں نے نہیں بتایا تو شاید مرے اندر ہی کوئی کمی ہو گی۔ میں مظفر جیسے آدمی کا دوست ہونے کا دعویٰ کیسے کر سکتا ہوں میں زندگی میں اس کا ہمسفر نہ بن سکا تو اس کے آخری سفر میں کیسے شریک ہوتا۔ میں تو خود اپنا ہمسفر بھی نہیں بن سکا، ہم خواب دیکھنے والے ایک راستے کے مسافر ہیں اور ہمسفر نہیں ہیں ہم کتنے بدقسمت ہیں کہ ساتھ ساتھ چلتے رہے اور ہمسفر نہ بن سکے۔ مجھ سے اس لڑکی نے پوچھا کہ سوہنی موت کیا ہوتی ہے اس نے پہلے پوچھا تھا کہ سانولا رنگ تمہیں پسند ہے وہ کیسا ہوتا ہے۔ میں نے اسے کہا تھا کہ تم نے کبھی آئینہ دیکھا ہے اس نے مجھے غور سے دیکھا جیسے اسے میرا جواب چاہیے تھا۔ میں نے اسے کہا کہ جب چاند نکلا ہوا ہو تو ماتھے پر ہاتھ رکھو کہ چاند تمہیں نظر نہ آئے۔ فضا میں دیکھو جو رنگ بکھرتا ہوا نظر آئے وہ سانولا رنگ ہے۔ سوہنی موت کے لئے میں نے اسے کہا کہ کبھی تم آدھی رات کے بعد اٹھو جب آسمان کی طرف دیکھنے والا کوئی نہ ہو، تمہارے سامنے اچانک کوئی تارہ ٹوٹے اور اپنی ہی روشنی کی لکیر میں گم ہو جائے۔ شاید مظفر محمد علی اسی طرح مرا ہو، دوسروں کے لئے تکلیف والی موت اسے آسودہ کر گئی ہو، وہ اپنی روشنی میں چھپ گیا ہے۔….
ایک ایک کرکے ستاروں کی طرح ٹوٹ گئے
ہائے کیا لوگ مرے حلقہ احباب میں تھے

راوی پل سے گزر کر میں میاں عبدالقیوم کے سکول فیروز والا پہنچا، شگفتگی سے بھری ہوئی کشادگی میں وسعت اور ویرانی گلے مل رہی تھیں ایک حیرانی نے مجھے گھیر لیا، شاہدرہ والے میاں محمود میرے ساتھ تھے۔ میاں عبدالقیوم ان کے چھوٹے بھائی ہیں پہلے وہ میاں محمود کے ساتھ تھے۔ انہوں نے نشتر کالونی فیروز پور روڈ میں ”کے پی ایس“ کے نام سے ایک سکول بنایا وہ بھی غریب لوگوں کی بستی ہے شہر کے ساتھ ہے اور شہر سے دور بھی ہے ۔ وہ چاہتے تو شہر کے کسی امیر کبیر ماڈرن علاقے میں سکول بنا سکتے تھے انہوں نے غریبوں کے درمیان رہنا پسند کیا ہے۔ یہ سکول کتنا شاندار اور قابل اعتبار ہے کہ میاں محمود کے اپنے بچے اس سکول میں پڑھتے ہیں ورنہ وہ کسی بڑے سے بڑے سکول کی فیس ادا کر سکتا ہے۔ پورے ملک سے والدین اپنے بچے اس سکول میں بھیجتے ہیں
میاں عبدالقیوم فیروز پور روڈ سے فیروز والا اٹھ آیا ہے، فیروز والا شاہدرہ کا محلہ لگتا ہے مگر شیخوپورہ کا گاو¿ں ہے یہاں لاہور اور شیخوپورہ سے بھی بچے بچیاں آتے ہیں۔ شاہدرہ میں میاں ذکا سکول چلاتے ہیں یہ سارے بھائی تعلیم و تدریس سے عشق کرتے ہیں ایک نئے نظام تعلیم کی تلاش میں یہ میاں برادران ہمسفر ہیں۔ سیاست کے میاں برادران بالخصوص میاں شہبازشریف تعلیم کے میدان میں بڑے جذبے کے ساتھ سرگرم ہیں۔ وہ شریف برادران کے طور زیادہ معروف ہیں۔ میاں صاحب تو بہت ہیں میاں برادران صرف شریف برادران ہیں جس طرح چودھری صاحبان بہت ہیں، چودھری برادران صرف چودھری شجاعت اور چودھری پرویز الٰہی ہیں۔ اب تعلیم کے میاں برادران کہاجائے گا تو دھیان شاہدرہ کے میاں محمود، میاں ذکا اور میاں عبدالقیوم کی طرف جائے گا ان کے سکول ان کے والد محترم کی آبائی زمین پر واقع ہیں۔ میاں عبدالقیوم کے سکول کا سنگ بنیاد 1994ءمیں ان کی والدہ محترمہ نے رکھا تھا اور یہ فخر میاں عبدالقیوم کے وجود میں وجد کرتا ہے۔ ماں کی گود بچے کے لئے پہلا سکول ہے۔ یہ آرزو میاں صاحب کو بے تاب رکھتی ہے کہ وہ اس ادارے کو علاقے کا بہترین سکول بنا دیں اتنے وسیع و عریض علاقے میں کوئی دیہاتی سکول میں نے نہیں دیکھا۔ میرا سکول موسیٰ خیل میانوالی میں حد نظر تک پھیلا ہوا تھا کہ وہاں کوئی چار دیواری ہی نہ تھی۔ میاں صاحب کے جذبوں کی سادگی دیکھیں کہ یہاں میرے جیسے خواب دیکھنے والے درویش قلمکار اور اس کا آئیڈیل بھائی میاں محمود مہمان خصوصی تھے۔ ہم دونوں نے گارڈ آف آنر کا معائنہ کیا۔ طالب علم سپاہیوں کے ارادے بلند تھے میں نے ایک کمانڈر فوجی سٹوڈنٹ سے کہا کہ مارشل لاءکبھی نہ لگانا مگر سیاستدانوں کی ”جمہوری بے یقینیوں “ پر نظر ضرور رکھنا۔ زین العابدین پریڈ کمانڈر تھا وہ اتنی بار مجھ سے ایوارڈ لینے کے لئے آیا کہ میں نے کہہ دیا کہ سارے انعام تم ہی لو گے۔ میاں عبدالقیوم نے اس کے والد کو بہترین والدین کہہ کر سٹیج پر بلا لیا ۔ مصطفیٰ صاحب سے گزارش ہے کہ والدین تو ماں باپ مل کر ہوتے ہیں۔ ماں کی بھی پذیرائی ہونا چاہئے تھی۔ میاں عبدالقیوم کی اہلیہ بھی ان کا ہاتھ بٹاتی ہیں سچ ہے کہ ایک کامیاب مرد کے پیچھے ایک عورت ہوتی ہے مگر وہ یہ بھی خیال رکھیں کہ ایک ناکام مرد کے پیچھے کئی عورتیں ہوتی ہیں۔ نازش اور مہوش نے بہت خوبصورت کمپیئرنگ کی۔ مجھے آخر تک پتہ نہیں چلا کہ ان کی آواز کہاں سے آ رہی ہے۔ آواز کا ایک راز ہے اور وہ دونوں ایک دوسرے کی ہمراز لگ رہی تھیں۔ لٹریری سوسائٹی کی مس سلمٰی نورین اور مس فریحہ بہت سرگرم تھیں۔ ڈاکٹر عافیہ کے حوالے سے ڈرامہ پیش کیا گیا۔ ڈرامہ لکھا ہے میمونہ جٹ نے اور ڈاکٹر عافیہ کا کردار حنا نے بہت خوبی سے ادا کیا ہے۔ اس کے ڈائیلاگ سن کر کئی عورتوں نے رونا شروع کر دیا۔ بہت محترم بچی ایوارڈ لینے آئی تو میں نے دیکھا اس کی آنکھوں میں آنسو تھے جو سب سے ہم کلام تھے کہ تمہاری غیرت و حمیت کہاں سو گئی ہے۔ اس ملک کے حکمران سیاستدان اور جرنیل امریکہ سے کیوں ڈرتے ہیں۔ قمر صاحب نے پی ٹی شو میں اور کراٹے ماسٹر منور بھٹی نے بچوں اور بچیوں سے ایسی پرفارمنس کرائی کہ دل خوش ہو گیا۔ اس سکول میں کوئی ایسا منظر دیکھنے کو نہ ملا کہ جسے دیکھنے کو دل نہ چاہا ہو۔ سب خواتین و حضرات نے خوب انجوائے کیا۔ یہاں میلے کا سماں تھا جیسے آج عید کا دن ہو، چاروں صوبوں کا ڈانس پاکستان کی مکمل ثقافت کا عکاس تھا ۔ مس شہلا نے اس میں قومی رنگ بھرنے کی کوشش کی تھی۔ ٹیچر اکمل ہمدانی کے لئے میاں صاحب نے بہت تعریف کی سارا سٹاف تعلیمی فروغ کے لئے یکجہتی کا پیکر بنا ہوا تھا۔ سکول کی پرنسپل مس انیلہ علی کیانی بہت قابل اور سنجیدہ خاتون ہیں وہ مستقل استانیوں جیسی شخصیت رکھتی ہیں مگر سٹاف ان کے ساتھ سینئر دوست کی طرح رہتا ہے۔
میاں عبدالقیوم اپنے سکول کے لئے ہر وقت سرگرم ہیں وہ ہر روز نئے سرے سے سکول میں آتے ہیں۔ سارا وقت کچھ نہ کچھ کرتے رہتے ہیں۔ انہوں نے اپنا سب کچھ سکول پر لگا دیا ہے، ان کی رہائش بھی سکول میں ہے وہ چھٹی کے بعد بھی سکول میں ہوتے ہیں
مکتب عشق کا دستور نرالا دیکھا
اس کو چھٹی نہ ملی جس نے سبق یاد کیا
اس شاندار تعلیمی ادارے کے لئے حکومت نے کچھ نہیں کیا کئی وزیر شذیر آئے اور دعوے کر کے چلے گئے جو سڑک سکول کی طرف جا رہی ہے وہ میرے دل کی طرح ٹوٹی پھوٹی ہے مگر سکول میں داخل ہوتے ہی ایک نیا جہاں سامنے ہوتا ہے۔ ایجوکیشن ٹاسک فورس کے چیئرمین راجہ انور سینیٹر پرویز رشید اور ایم پی اے عارفہ خالد اس سکول میں آئیں اس کے بعد شہبازشریف خود یہاں آئیں میں میزبان کے سکول میں موجود رہوں گا۔ مہمان کے طور پر یہی لفظ و خیال میاں صاحب کی نذر کرتا ہوں۔
خواتین حضرات نے سوال و جواب کی اس محفل سے بڑا لطف اٹھایا جو ساتویں جماعت کی بچیوں نے ٹیچر نرگس کی نگرانی میں پیش کیا۔ استانی بھی بچی تھی۔ ٹیچر برطانیہ کہاں ہے؟ بچی ، پتہ نہیں….ٹیچر نالائق کرسی پر کھڑی ہو جاو۔ بچی کیا وہاں سے نظر آ جائے گا۔؟
چیف منسٹر ہاوس 90 ، مال لاہور سے کے پی ایس سکول فیروز والا بہت دور ہے کرسی پر بیٹھ کر تو بالکل نظر نہیں آتا۔

ڈاکٹر محمد اجمل نیازی
یوم حمید نظامی پر ایک یادگار اور شاندار تقریب ہوئی، مقررین نے حمید نظامی کی یاد میں مجید نظامی کے ذکر کو شامل کیا، نظامی صاحبان صحافی برادری کے لئے اعتبار، وقار اور جرا¿ت اظہار کی ایک زندہ روایت کی طرح ہیں۔ ممتاز شاعرہ، ادیبہ، خطیبہ، کالم نگار، ایم این اے اور بُلبلِ پاکستان بشریٰ رحمان نے کہا کہ نظامی وہ ہے جو نظام بدلنے کی آرزو اور ارادہ سے لبریز ہو۔ آرزو ہی ارادہ بنتی ہے تو قدرت اس کی مددگار ہو جاتی ہے۔ اپنے بڑے بھائی حمید نظامی کی یاد سے مجید نظامی نے دلوں کو آباد رکھا ہے۔ 23 مارچ 2010ءکو نوائے وقت کی اشاعت کو 70 برس ہو رہے ہیں جس میں سے پچاس مجید نظامی کے ہیں۔ اللہ انہیں سلامت رکھے (آمین)۔ حمید نظامی نوائے وقت کے بانی ہیں، نوائے وقت کے دور ثانی کے بانی مجید نظامی ہیں۔ نصف صدی کی حکایت کو حقیقت بنانے میں وہ سرخرو اور سرشار ہوئے ہیں۔
جنرل حمید گل نے مجید نظامی کو حمید نظامی کا تسلسل قرار دیا۔ جنرل حمید گل کو ریٹائرڈ جنرل کہنے کو جی نہیں چاہتا۔ شاہد رشید انہیں ”غازی پاکستان“ کہتے ہیں۔ امریکہ اور بھارت صرف دو آدمیوں سے ڈرتے ہیں مجاہد ملت مجید نظامی اور جنرل حمید گل سے مجید نظامی کہتے ہیں کہ حمید نظامی میرے بڑے بھائی تھے۔ حمید گل میرے چھوٹے بھائی ہیں۔ دونوں صاحب سیف وقلم ہیں….
یہ غازی یہ تیرے پُراسرار بندے
جنہیں تو نے بخشا ہے ذوق خدائی
ج: سے جج، جرنیل اور جرنلسٹ تو سنا تھا، جنرل حمید گل نے کہا کہ ج سے جہاد، جمہوریت اور جوہری صلاحیت بنے۔ یہ بھی کہا گیا کہ نوائے وقت ایٹم بم ہے۔ مجید نظامی نے کئی بار کہا کہ میں ایٹم بم بن کر بھارت پر گِرنا چاہتا ہوں۔ وہ پاکستان میں جہاد اور جمہوریت کے سب سے بڑے علمبردار ہیں۔ چیلنجز سے نبٹنے کے لئے حمید نظامی کی سوچ کو اپنایا جائے۔ مجید نظامی نے حمید نظامی کے مشن کو آگے بڑھایا ہے۔ جنرل حمید گل نے بہت خوب بات انگریزی کے محاورے کے حوالے سے کی کہ King is dead Long live king بادشاہ مر گیا اللہ بادشاہ کی زندگی دراز کرے۔ حمید نظامی چلے گئے، مجید نظامی موجود ہیں اللہ انہیں دیر تک ہمارے درمیان موجود رکھے۔ یہ ایک تسلسل ہے جو ہمیشہ جاری رہے گا۔ سی پی این ای کے صدر لیڈر صحافی خوشنود علی خان نے کہا کہ اللہ کرے ہر کسی کو مجید نظامی جیسا بھائی ملے۔ حمید نظامی کی نظریاتی وراثت کو برادرانہ وراثت کی مسیحائی اور عظمت مجید نظامی نے عطا کی۔ حمید نظامی پاکستان بننے کے 14 سال بعد فوت ہو گئے انہوں نے خود مجید نظامی کو انگلستان سے بلایا اور خود سب کچھ ان کے حوالے کر دیا وہ 50 سال سے اس عظیم وراثت کے تمام تقاضے پورے کر رہے ہیں۔ انہوں نے کسی قربانی سے دریغ نہیں کیا۔ ذاتی اثاثے نہیں بنائے سب کچھ قوم کے لئے وقف کر دیا۔ قوم نوائے وقت کی وارث ہے اور وہ مجید نظامی کے ساتھ ہے۔ اللہ نے حمید نظامی کو جتنا موقع دیا۔ انہوں نے اس سے بڑھ کر کام کیا۔ مجید نظامی نے اس کام کو کارنامہ بنا دیا ہے صحافی برادری میں نظامی برادران، جرا¿ت اظہار اور صداقت اظہار کی سب سے اعلیٰ مثال ہیں۔ مجھے ہر روز کئی فون آتے ہیں۔ ملتان سے عبدالباسط خاکوانی نے کہا ہے کہ میری طرف سے علامہ اقبالؒؒ کا یہ شعر مجید نظامی صاحب کی خدمت میں پیش کریں….
اقبال بھی اقبال سے آگاہ نہیں ہے
کچھ اس میں تمسخر نہیں واللہ نہیں ہے
خاکوانی صاحب کہتے ہیں کہ ”مجید نظامی ایک بیش بہا انسان ہیں ان کی بات سنی جاتی ہے، وہ دو قومی نظریہ کے فروغ کے لئے بھارت کی دشمنی سے لوگوں کو بچانے کے لئے امریکہ کو للکارنے کے لئے میدان میں ہیں۔ وہ ایک تھنک ٹینک بنائیں اور اس قوم کی رہنمائی کریں۔ امریکی میرین اسلام آباد پر قبضہ کرنے والے ہیں، بھارت پانی بند کر کے پاکستان کو ریگستان بنا رہا ہے“ میں نے خاکوانی صاحب کو بتایا کہ یوم حمید نظامی پر لوگوں نے قائداعظمؒ ، علامہ اقبالؒ حمید نظامی اور مجید نظامی کے نعرے بلند کئے۔ تینوں تصویریں خاموش تھیں اور مجید نظامی کسی گہری سوچ میں گُم تھے۔
ہر مقرر حمید نظامی کی یاد میں مجید نظامی کا ذکر ملائے چلا جا رہا تھا یہ ذکر اب ذکر خیر بن گیا ہے۔ مجید نظامی کی آرزو ہے کہ جو باخبر ہیں وہ اہل خبر بن جائیں، اہل خبر ہی اصل میں اہل خیر ہوتے ہیں۔ حضرت پیر کبیر علی شاہ کی روحانی قیادت میں بہت لوگ محفل میں آئے تھے۔ فضا حق ھُو سے گونجنے لگی تھی۔ یہ کلمہ حق کی خوشبو ہے، کلمہ حق جہاد ہے۔ حضرت پیر کبیر علی شاہ نے محفل کو زندہ کر دیا۔ روحوں کو گرمایا اور دلوں کو تڑپایا۔ یہ کام اس سے پہلے خوشنود علی خان نے کیا۔ حاضرین میں سے آواز آئی کہ خوشنود نے ”کڑاکے کڈھ“ دتے نیں۔ اس نے اپنے آپ کو خوش نصیب کہا کہ مجھے مجید نظامی کی قربت ملی ہے۔ وہ ”جناح“ کا چیف ایڈیٹر ہے اور اخبار کو محمد علی جناح کا اخبار بنانا چاہتا ہے۔
چورہ شریف کے سجادہ نشین پیر کبیر علی شاہ عالمی مبلغ ہیں۔ پچھلے 50 سال سے اشاعت دین کا کام کر رہے ہیں۔ اب تک کروڑوں بار درود شریف پڑھ چکے ہیں۔ انہوں نے جرا¿ت اظہار کے حوالے مجید نظامی کو اپنا رہنما تسلیم کیا۔ انہوں نے دستار فضلیت خود مجید نظامی کو باندھی۔ اس موقع پر تین اکابر حضرات قاضی حسین احمد، غوث علی شاہ اور سرتاج عزیز بھی موجود تھے۔
صدر محفل کرنل امجد حسین حمید نظامی کے سب سے پرانے دوست ہیں۔ یہ بھی روایت قائم ہوئی کہ انہوں نے سب سے پہلے محفل سے خطاب کیا۔ اس لمحے کی گواہی دی جب علامہ اقبالؒ نے حمید نظامی کو مسلم سٹوڈنٹس فیڈریشن بنانے کی ہدایت کی، اور وہ ہی ایم ایس ایف کے پہلے صدر تھے۔ ایک شاندار بوڑھے کے بعد ایک شاندار نوجوان لیڈر خواجہ سعد رفیق نے خطاب کیا وہ مسلم سٹوڈنٹس کے سابق صدر ہیں ابھی تک سٹوڈنٹ لیڈر کی بے قراریاں اس کے وجود میں تڑپتی ہیں۔ اس نے سیاست میں بے مثال جدوجہد کی ہے۔ شاید اس وقت وہ مسلم لیگ ن میں سب سے اچھے مقرر ہیں۔ اس نے کہا کہ نوائے وقت سیاستدانوں کو آئینہ دکھاتا ہے اور راستہ بھی دکھاتا ہے۔ حمید نظامی نے مسلم سٹوڈنٹس فیڈریشن بنائی تو مسلم لیگ کو طاقت ملی۔ مجید نظامی حمید نظامی کے سچے جانشین ہیں۔ الیکٹرانک میڈیا کو پرنٹ میڈیا کے فٹ پرنٹس پر چلنا چاہئے۔ خواجہ صاحب، قاضی حسین احمد کو مجاہد پاکستان کہتے رہے میں قاضی حسین احمد کو بھی کبھی سابق امیر جماعت اسلامی نہیں کہتا۔ میں نے تو کبھی چیف جسٹس افتخار چودھری کو غیر فعال چیف جسٹس نہیں لکھا تھا۔ کسی سیاسی جماعت میں کوئی عام آدمی لیڈر نہیں بن سکتا۔ جماعت اسلامی میں ایک غریب آدمی بھی امیر جماعت ہو سکتا ہے۔ عمران خان دیر سے پہنچے ان کی تقریر دیر آید درست آید کے مصداق بہت پسند کی گئی۔ اس نے کہا کہ حمید نظامی میرے والد مرحوم کے دوست تھے اور میں نے گھر میں ان کا بڑا ذکر سنا ہے۔ میں نے مجید نظامی کو دیکھا ہے اور وہ اپنے بھائی کی مکمل تصویر ہیں وہ نظریئے کا جہاد کر رہے ہیں۔ جہاد سے بھی زیادہ قلم کے جہاد کی ضرورت ہے۔
تقریب کے لئے شاہد رشید اور ان کے ساتھیوں نے بہت محنت کی۔ شاہد رشید کو نظریہ پاکستان ٹرسٹ میں کامیاب تقریبات کا بڑا تجربہ ہے۔ سلمان غنی اخبار کی طرف سے بہت سرگرم تھے۔ یہ نوائے وقت کی تقریب تھی اور حمید نظامی میموریل سوسائٹی کے زیر اہتمام اجتماع یہ پہلا اجتماع تھا اس شاندار ابتداءپر لوگوں نے مجید نظامی کو مبارکباد دی۔

”اخوت“ کے سربراہ ڈاکٹر امجد ثاقب نے ایک انوکھے شخص ذکی الدین خلیفہ سے ملوایا جو امریکہ میں رہتے ہیں اور پاکستان ان کے دل میں رہتا ہے۔ وہ شجاع الدین خلیفہ کے پوتے ہیں۔ ان کے دادا کے دادا انجمن حمایت اسلام کے پہلے صدر تھے۔ وہ امریکہ میں بلین ڈالرز عطیات دیتے ہیں۔ اس میں کوئی تحصیص نہیں وہ کہتے ہیں کہ میں نے امریکہ میں رہ کر کمایا ہے تو مجھ پر امریکیوں کا بھی حق ہے۔ وہ پاکستان میں بھی کئی اداروں کو امداد دیتے ہیں۔ بنگلہ دیش کے عالمی شہرت یافتہ ڈاکٹر یونس کے ادارے کو ڈونیشن دینے کیلئے جا رہے تھے کہ انہیں ”اخوت“ کا پتہ چلا۔ ڈاکٹر امجد ثاقب سے ایک تقریب میں ملاقات ہوئی۔ انہوں نے فی الحال بنگلہ دیش جانے کا ارادہ ملتوی کر دیا ہے۔ ”اخوت“ کے تحت لاکھوں لوگوں کو 35 ہزار تک کے قرضے دیئے جا چکے ہیں۔ بعد میں رقم بڑھائی بھی جا سکتی ہے۔ اس قرض پر کوئی سود نہیں لیا جاتا۔ یہ بلاسود بنک کاری کی طرف ایک شاندار ابتدا ہے۔ ڈاکٹر یونس بھی قرضے دیتے ہیں اور اس پر 30 فیصد سے زیادہ سود ہوتا ہے۔ پھر بھی یہ غنیمت ہے کہ غریبوں کو تو قرض ملتا نہیں۔ اس میں اتنی مشکلیں ہیں اور پھر اس قرض کی ادائیگی میں اس سے بڑھ کر مشکلیں ہیں۔ ہمارے ملک میں کروڑوں اربوں کا قرض آسان ہے ہزاروں لاکھوں کا مشکل ہے۔ امیر کبیر وزیر شذیر حکمران افسران کرپٹ اور ظالم لوگ جتنی آسانی سے قرض لیتے ہیں اس سے زیادہ آسانی کے ساتھ قرض معاف کروا لیتے ہیں یہ قرض قوم کے لئے مرض بن گیا ہے جب کہ ڈاکٹر امجد ثاقب اور اس کے ساتھی قرض کی خیرات کو ایک فرض سمجھتے ہیں۔ فرض اور قرض میں ایک نقطے کا فرض ہے۔ یہ بات ذکی الدین خلیفہ کو پسند آئی۔ اس ایک نقطے کو سمجھانے ڈاکٹر امجد اور ان کے ساتھی بہت دور نکل آئے ہیں۔ اور منزل بہت قریب ہے۔ منزل سے پہلے بھی منزلیں ہوتی ہیں راستوں اور مسافروں سے محبت کرنے والے منزلوں کو خاطر میں نہیں لاتے۔ منزلیں خود ان کی راہ دیکھتی ہیں۔ مجھے اچانک شعر یاد آیا ہے۔ ….
گھر کی جانب جانے والے راستوں جیسا ہے وہ
منزلوں سے پیشتر ہی منزلوں جیسا ہے وہ
ڈاکٹر امجد اور اس کے ساتھی ایسے ہی ایک شخص ہیں۔ اس نے ایک ایسے ہی شخص ذکی الدین خلیفہ سے ملوایا تو بڑا لطف آیا۔ وہ بے نیاز آدمی ہیں ایک قلندرانہ نیاز کے بغیر یہ ادا آدمی کو نہیں ملتی۔ نازونیاز اکٹھے ہوں تو پتہ دیتے ہیں۔ ان کی موجودگی میں اس کمرے کے اندر خلافت قائم ہو گئی تھی۔ یہ خلافت پورے ملک میں قائم ہو سکتی ہے۔ ذکی صاحب اور ڈاکٹر امجد ثاقب جیسے لوگوں کو معاملات چلانے دیں۔ ذکی صاحب نے نوائے وقت میں میرے کالموں کا بڑی محبت سے ذکر کیا۔ میرے کالم ”پولیس کی چھترول“ پر بات کی اور بات امریکی پولیس کی طرف چلی گئی۔ یورپ اور امریکہ میں افسران اور پولیس عوام کے لئے ہیں۔ ہمارے ملک میں حکام کے لئے ہیں۔ آج بیرون ملک کسی کی کوئی عزت نہیں کہ اندرون ملک کوئی عزت نہیں۔ اور بیرون ملک عام لوگ نہیںجا سکتے۔
امریکہ میں ذکی الدین خلیفہ جیسے لوگ امریکہ کی عزت بڑھاتے ہیں اور پاکستان کی عزت بھی بڑھاتے ہیں۔ جان و مال کی قربانی میں جان کی قربانی کا مرتبہ زیادہ ہے مگر مشکل مال کی قربانی ہے اس مشکل کو آسان کرنا دل والوں کا کام ہے۔ دل والے دل والوں کو تلاش کرتے ہیں۔ اور وہ ایک دوسرے کو مل جاتے ہیں۔ ذکی صاحب اور امجد صاحب کی ملاقات ہو گئی اور پھر ہم کئی دوستوں نے ذکی صاحب سے ملاقات کر لی۔ چیمبر آف کامرس کے شاہدحسن نے بہت اچھی باتیں کی۔ ڈاکٹر امجد ثاقب چاہتے ہیں کہ اخوت کی بات ہو۔ اس نے ہمایوں احسان ڈاکٹر اظہار شمسی اور کئی ساتھیوں کا ذ کر کیا۔ ”اخوت“ کے حوالے سے ڈاکٹر امجد ثاقب کو یا اخی کہنے کو دل کرتا ہے۔ بھائی چارے کا یہ انداز بے مثال ہے۔ ”اخوت“ کے حوالے سے جو قرضے دیئے جاتے ہیں وہ قرضہ حسنہ ہوتے ہےں۔ حیرت ہے کہ ان قرضوں کی واپسی میں نہ مشکل پیش آتی ہے اور نہ دیر ہوتی ہے۔ پاکستان میں اور بھی ادارے ہیں جو سود پر قرض دیتے ہیں۔ انہیں باہر سے گرانٹس ملتی ہیں حکومت بھی مدد کرتی ہے۔ یہ ادارے بھی غنیمت ہیں مگر ڈاکٹر امجد ثاقب کا ادارہ ”اخوت“ ایک نعمت ہے۔ روشانہ ظفر کے ادارے کا نام کشف ہے۔ اس نے ڈاکٹر یونس سے متاثر ہو کر خدمت خلق شروع کی ہے۔ معروف شاعر برادرم ناصر بشیر شہر بھر میں دوستوں کے لئے آوارہ گردی کرتا ہے۔ ایک دن موٹر سائیکل پر میرے پاس آیا اور بتایا کہ اخوت سے قرض لے کر موٹرسائیکل لے لی ہے۔ ایک اچھی لڑکی نے میرے امتحان کے لئے داخلے کے پیسے میرے دوست کو دیئے تھے وہ خود کھا گیا مگر مجھے بتا دیا۔ میں کچھ عرصے کے بعد اس بڑے دل والی خاتون کے پاس گیا کہ میں تمہارے پیسے واپس کر سکتا ہوں مگر میں تمہارا مقروض رہنا چاہتا ہوں بڑے دل والی خاتون نے کہا کہ تم مجھے کروڑوں روپے بھی دیتے تو اس جملے کے برابر نہیں ہو سکتے تھے۔ میں نے ڈاکٹر صاحب سے قرض نہیں لیا مگر میں ان کا مقروض ہوں۔ مرزا غالب کے گھر کا سودا لینے والی خاتون سے دکاندار نے کہا کہ وہ تو سارے شہر کا مقروض ہے اس نے کہا کہ یہ بھی تو دیکھو کہ ان کی آئندہ نسلیں مرزا غالب کی مقروض ہوں گی۔
راجہ انور نے کہا کہ ”ڈاکٹر امجد ثاقب کو نوبل پرائز ملنا چاہئے“۔ وہ اتنا نوبل آدمی ہے کہ اسے کسی پرائز کی حاجت نہیں ہے۔ حاجت روائی کرنے والے ان رسمی باتوں کے محتاج نہیں ہوتے۔ ذکی صاحب نے کہا کہ ڈاکٹر یونس کو نوبل پرائز ملا ہے تو ڈاکٹر امجد کا کام تو اس سے آگے کا ہے۔ مگر میں امجد صاحب سے کہہ رہا ہوں کہ اگر اسے نوبل پرائز ملے تو وہ قبول کر لے۔ انشااللہ اب یہ ادارہ امریکہ میں بھی رجسٹر ہو جائے گا ڈاکٹر یونس کے لئے یہ اعزاز کم نہیں ہے کہ صدر اوباما ڈاکٹر یونس سے بغل گیر ہو گئے جب کہ ہر کسی سے ہاتھ ملاتے ہوئے آ رہے تھے۔ ڈاکٹر امجد ثاقب نے جسٹس عامر رضا کا ذکر کیا جو کئی خیراتی ادارے چلا رہے ہیں۔ معذور بچوں کا ادارہ امین مکتب بڑا ادارہ ہے مکتب عشق کی طرح لگتا ہے شہباز شریف نے معذور بچوں کے لئے قرض دینے کا تجربہ کرنے کو کہا ہے۔ اس کے لئے امداد بھی دی ہے۔ پاکستان میں مخیر حضرات بلکہ خواتین وحضرات کہنا چاہے بہت ہےں۔ ڈاکٹر امجد ثاقب کا پیغام ہے کہ مایوسی نہ پھیلائی جائے! !

حلقہ 123 آج کل صرف ”ون ٹو تھری“ کے نام سے یاد کیا جا رہا ہے! اور اپنے نام کی طرح بہت سہولت کے ساتھ زیرِبحث لایا جا رہا ہے!
مانسہرہ اور راولپنڈی کے بعد لاہور ”میثاقِ جمہوریت“ کی کسوٹی پر پرکھا جانے والا ہے! متوالے تو جناب پرویز ملک کے لئے ہی ”ووٹ“ ڈالیں گے! مگر دیکھنا یہ ہے کہ ”جیالے“ کس طرف ”وزن“ بڑھائیں گے؟ حالانکہ نواز شریف کا نام آتے ان کی آنکھیں سرخ ہو جاتی ہیں گویا رات بھر کے جاگے ہوں!
لاہور دن رات جاگا کرتا تھا مگر لاہور کے شہری دن رات ایک ”سکون“ میں گزارتے! بازاروں کا شوروغل ان کے گھروں تک پہنچ پاتا تھا! مگر پے درپے دھماکوں نے پورے پاکستان کی طرح لاہور پر بھی اثرات مرتب کئے! لاہور ناکوں کا شہر بن گیا! پہلے یہ ”باغوں کا شہر“ ہوا کرتا تھا! باغوں میں ”مشاعرے“ ہوا کرتے اور ہر ”شاعر“ استاد ہوری آکھدے نیں کہہ کر آدھ آدھ گھنٹے تک ”استادِ گرامی“ کے اشعار سناتا اور داد سمیٹ سمیٹ کر ان کے درِ دولت پر پہنچاتا حتیٰ کہ حافظہ جواب دے جاتا اور پھر وہ کہتا ”عرض کیتا اے!“ اور پھر اپنا ”کلامِ بلاغت نظام“ سنانے کے کام سے لگ جاتا! مگر مجال ہے کہ کسی پیشانی پر شکن نمودار ہو پائے! لوگ گھروں سے شعر سننے اور سنانے کے لئے آتے اور جی بھر کے سنتے بھی اور جی بھر کے سناتے بھی! یہ لاہور کا مزاج تھا اور یہی لاہور کا مزاج ہے! دوسرے کی بات تحمل سے سننا لاہوریوں کی عادت ہے مگر ”جواب“ دینا بھی لاہوریوں کی فطرت کا حصہ ہے! بعض اوقات تو وہ بالکل جواب دے دیتے اور خاموشی اختیار کر لیتے!
ہمارے تمام ”فاتحین“ لاہوریوں کی خاموشی کے غلط اندازوں پر راج تا راج کرتے رہے مگر لاہور کے اٹھ کھڑے ہونے پر ”صاف جوابا“ ان کی سمجھ میں بھی آ جاتا اور وہ رستہ بدل جاتے!
”ون ٹو تھری“ لاہور کا دل ہے! یہاں امرتسر کے مہاجروں کے ساتھ ساتھ پورے جنوبی ایشیاءکے افراد مل جاتے ہیں! پاکستانی قومیتوں میں سے پٹھان اور بالائی پنجاب کے افراد کے علاوہ زیریں پنجاب اور اس سے ملحقہ بلوچ علاقوں کے افراد بھی لاہور کی آبادی کا معتدبہ حصہ ہیں! مگر ”نواز شریف“ ان تمام لوگوں کے لئے ”امید کا واحد ستارا“ ہیں!
جناب نواز شریف کے حلقے سے مسلم لیگ نون کے امیدوار کی فتح کا نقارہ تو ”خدائی آواز“ کی طرح گونج رہا ہے! ”کون جیتے گا؟“…. ”نواز شریف!“ سوال گندم اور جواب بھی گندم! گویا پاکستانی عوام کے لئے مسلم لیگ نون کا ہر امیدوار نواز شریف ہے مگر ”مانسہرہ“ میں کیا ہوا؟ راولپنڈی میں کیا ہوا؟ شاید نواز شریف کے مخالف یکجا اور یکجان ہو گئے! اور ضمانتوں کے ساتھ ساتھ شرط پر لگائی گئی ”حویلیاں“ بھی بچ گئیں!
ہم کسی طور بھی 10 مارچ 2010ءکی شام طلوع ہونے سے پہلے اپنی ذاتی رائے نہیں دے سکتے! یہ تو ”ون ٹو تھری“ کے تھڑوں، چائے خانوں اور انتخابی دفاتر کے نظارے ہیں کہ ہم نے قلم بند کر دئیے ہیں! ورنہ لوگ ایسی ایسی باتیں کر رہے ہیں کہ لگتا ہے :
آنسو نکل رہے ہیں! رستے بدل بدل کے
”پاکستان“ کے ”غم“ اور ”پاکستانی عوام“ کے ”دم“ کا ذکر کرتے کرتے کیا کچھ ”غم“ ہوتا چلا جا رہا ہے! آنکھ جو کچھ دیکھتی ہے، لب پر آ سکتا نہیں! کہے بغیر کوئی اور چارہ نہیں رہ جاتا!

عزیزم حمزہ شہبازشریف ممبر قومی اسمبلی نے بہت ذو معنی بلکہ معنی خیز بات کی ہے کہ لولی لنگڑی پارلیمنٹ کا حصہ نوازشریف نہیں بننا چاہتے۔ اسی پارلیمنٹ کو بچانے کے لئے انہوں نے فرینڈلی اپوزیشن کا طعنہ بھی سنا ہے، یہ پارلیمنٹ جیسی بھی ہے رہے گی تو نواز شریف اور ان کی فیملی کی باری آئے گی۔ وہ صدر زرداری کی صدارت کے لئے پریشان نہیں ہیںمگر جس نظام کے تحت وہ صدر ہیں اگر نہ بچا تو پھر بہت دیر ہو جائے گی۔ میں ہمیشہ آمریت کے خلاف لڑتا رہا ہوں مگر جمہوریت کے دعویدار کیا کر رہے ہیں۔ کیا اقتدار کا حصول جمہوریت ہے؟ اس پارلیمنٹ کے سربراہ مخدوم گیلانی ہیں۔ وہ نہ صرف وزیراعظم ہیں بلکہ چیف ایگزیکٹو بننے کی کوشش کر رہے ہیں اس کوشش میں نوازشریف شہبازشریف ، حمزہ شہباز شریف اور ہر سیاسی شریف مخدوم گیلانی کے ساتھ ہے۔ مگر جب وزیراعظم نوازشریف کا نعرہ گونجتا ہے تو مخدوم صاحب کا دل کانپنے لگتا ہے۔ وہ سترھویں ترمیم بالخصوص تیسری بار وزیراعظم اور وزیراعلیٰ بننے کی شق کے خلاف ہیں اور اس طرح خلاف ہیں کہ ہم وزیراعظم ہوں اور وزیراعلیٰ بھی ہماری فیملی سے ہو میں تو صدر کے لئے بھی تیسری بار کی شرط اس میں شامل کرنے کے حق میں ہوں چونکہ تیسری بار صدر بننے کا امکان کم کم ہے اس لئے یہ ضروری نہیں سمجھی گئی جبکہ اس وقت جنرل مشرف خود صدر تھے اس لئے بھی یہ شرط ضروری نہ سمجھی گئی۔ یہاں اقتدار کی باریاں مقرر ہیں اور اس کا تعلق ”بار بار“ سے ہے۔ بی بی صاحبہ اور میاں صاحبان دو دو دفعہ باری لے چکے ہیں اسی لئے تیسری بار کی شرط فوراً ختم ہونا چاہیے۔ میں تو یہ بھی کہتا ہوں کہ کوئی آدمی ممبر قومی و صوبائی اسمبلی اور سینیٹر بھی تیسری بار نہ بنے۔ سیاستدانوں نے اپنے لئے یہ کریڈٹ بنا رکھا ہے کہ میں چھ سات دفعہ ممبر اسمبلی رہ چکا ہوں جیسے کہتے ہیں کہ میں 25 عمرے کر چکا ہوں۔ ممبران اسمبلی کا یہ شیوہ ہے کہ میں نے پہلے بھی کوئی کام نہ کیا تھا اور اب بھی کوئی کام نہیں کروں گا لوگوں سے پوچھا جائے کہ آپ ایسے شخص کو ووٹ کیوں دیتے ہیں۔ کئی لوگ تکلفاً مانگتے ہیں اس بات کا شیخ رشید کی اس بات سے تعلق نہیں کہ میرے مخالف کو جتوایا گیا ہے۔ وہ جب جیت جاتے تھے تو انہیں کون جتواتا تھا۔میں نے بات حمزہ شہبازشریف کی اس بات سے شروع کی تھی کہ یہ پارلیمنٹ لولی لنگڑی ہے کیونکہ نوازشریف اس کے ممبر نہیں بننا چاہتے ہیں وہ تو وزیراعظم بننا چاہتے ہیں۔ شہبازشریف کے لئے اس منصب کی آسانی ہے پھر پنجاب کی وزارت اعلیٰ کے لئے بھی پریشانی نہ ہو گی۔ حمزہ شہبازشریف ہیں نا۔!
لولے لنگڑے لوگ زندگی گزار جاتے ہیں تو ہماری لولی لنگڑی پارلیمنٹیس بھی زندگی گزار جاتی ہیں۔ یہ زندگی شرمندگی ہے ورنہ درندگی ہے کچھ لوگ شرمندگی سے بھی درندگی کا کام لینا جانتے ہیں، پچھلی پارلیمنٹ تو پھر بالکل ہی لولی لنگڑی تھی مگر وہ اپنی پوری عمر یعنی مدت گزار گئی۔ اس لولی لنگڑی پارلیمنٹ کے کئی ارکان اب بھی ایم این اے ہیں جمہوریت آنے کے بعد اب یہ بھی لولی لنگڑی پارلیمنٹ ہے تو پھر صحیح سالم پارلیمنٹ کب آئے گی ۔ ہمارے ملک میں پارلیمنٹ کی تاریخ ایسی ہی ہے۔ پارلیمنٹ سیاسی جرنیلوں اور سیاستدانوں کے ادوار میں ایک سی رہی ہے۔ یقیناً حمزہ شہباز کے خیال میں وہ پارلیمنٹ لولی لنگڑی نہ تھی جس کے وزیراعظم نوازشریف تھے مگر وہ اپنی عمر ہی پوری نہ کر سکی۔ ع
حسرت ان غنچوں پہ ہے جو بن کھلے مر جھا گئے
اگر وہ پارلیمنٹ جمہوری ہوتی اور کچی پکی نہ ہوتی تو جس وقت توڑی گئی تھی تو نہ ٹوٹتی۔ سارے پارلیمنٹیرین ڈٹ جاتے مگر ہمارے سیاستدانوں میں یہ جرا¿ت اہلیت، دیانت، استقامت اور غیرت ہی نہیں ہے کہ وہ ثابت قدمی دکھائیں، یکجہتی پیدا کریں عوام کےلئے کچھ کریں خزانے پر حق صرف ان کی فیملی کا نہیں ہے۔ خدا کرے اب سیاست پر بُرا وقت نہ آئے مگر مجھے ان سیاستدانوں سے کوئی امید نہیں ہے۔ جمہوریت کی بات کرنے والے اپنے رویے اور اپنی سیاست اور اپنی جماعتوں میں جمہوریت نہیں لاتے کسی کی جرا¿ت نہیں کہ پارلیمانی پارٹی کی میٹنگ میں یا کہیں بھی اپنے سربراہ سے اختلاف کر سکے۔ ہمارے ملک میں نہ جمہوریت آئی، نہ آمریت آئی۔ آمریت کے بھی جو ثمرات ہو سکتے تھے وہ عوام کو نہیں ملے۔ یہاں آمرانہ جمہوریت رہی ہے یا جمہوری آمریت۔حیرت ہے کہ خود حمزہ شہباز اسی لولی لنگڑی پارلیمنٹ کا حصہ ہیں۔ جس ٹکٹ پر نوازشریف تھوکتے بھی نہیں وہی ٹکٹ حاصل کر کے پرویز ملک پھولے نہیں سماتے۔ وہ پہلے بھی ممبر قومی اسمبلی تھے اور تب پارلیمنٹ بہت لولی لنگڑی تھی ۔ پرویز ملک کو پہلے ٹکٹ نہ دیا گیا تھا جس کا افسوس ہم نے مل کر کیا تھا۔ ٹکٹ نہ ملنے کی وجہ بظاہر یہ تھی کہ وہ جسٹس (ر) اور اٹارنی جنرل ملک قیوم کے بھائی ہیں۔ جسٹس قیوم پر یہ بھی الزام ہے کہ انہوں نے نوازشریف کے کہنے پر بے نظیر بھٹو کے خلاف فیصلہ دیا تھا۔ ملک قیوم میں کوئی خوبی تو ہو گی کہ اس کے بعد انہیں وکیلوں نے صدر سپریم کورٹ بار بنا دیا۔ سب نے سیاست و حکومت میں اس طرح کے فیصلے کئے ہیں۔ پرویز ملک اب بھی ملک قیوم کے بھائی ہیں اب کیا ہوا ہے کہ انہیں اس ٹکٹ کا حقدار سمجھا گیا ہے۔ ان کی سگی بہن محترمہ یاسمین رحمان پیپلز پارٹی کی طرف سے پہلے بھی ممبر قومی اسمبلی تھیں اب بھی ہیں، بے نظیر بھٹو کو شاید معلوم نہ تھا کہ وہ ملک قیوم کی بہن ہیں؟ شریف فیملی میں کریڈٹ صرف ان کی پسند و ناپسند ہے اور یہ پسند و ناپسند بدلتی رہتی ہے۔ اس سے پہلے شہباز شریف نے پرویز ملک کو اپنا اسسٹنٹ یا مشیر بھی بنا لیا تھا۔ میری ملاقات پرویز ملک سے ہے۔ وہ سلجھے ہوئے آدمی ہیں دھیمے اور دوستانہ مزاج والے ہیں۔ انہیں ان دونوں سیاسی نوازشوں کو قبول نہیں کرنا چاہیے تھا۔ میرے لئے یہ بات بھی ناقابل فہم ہے کہ اس وقت خواجہ سعد رفیق ، مرغوب احمد، نصیر بھٹہ بھی موجود تھے اور بھی ممبران اسمبلی ہوں گے۔ حیرت صرف خواجہ سعد رفیق کے لئے ہے وہ شہید خواجہ رفیق کے بیٹے ہیں۔ فطری طور پر سیاستدان اور لیڈر ہیں کہ بنیادی طور پر ورکر ہیں۔ ن لیگ میں شاید ان سے بہتر مقرر کوئی نہیں ۔!

چنیوٹ میں سرعام دو نوجوانوں کو برہنہ کر کے کوڑے مارے گئے۔ یہ ایسا ہی واقعہ ہے کہ سوات میں مبینہ طور پر طالبان نے ایک عورت کو لوگوں کے ہجوم کے درمیان کوڑے مارے تھے ۔ غالباً لڑکی کے بھائی نے اسے پکڑ رکھا تھا تا کہ کسی غیر محرم کا ہاتھ لڑکی کو نہ لگے۔ کوڑے مارنے والا غیر محرم تھا مگر طالبان تھا۔ تب فارن فنڈڈ این جی اوز کی ماڈرن عورتیں میڈیا پر آ کے چیختی چلاتی رہیں۔ آج تک یہ واقعہ ایک راز ہے اور ہمراز کوئی بھی نہیں۔ یقیناً انہوں نے چنیوٹ کے دو نوجوانوں کو پولیس والوں سے کوڑے لگتے دیکھے ہوں گے۔ انہوں نے برا نہیں محسوس کیا ہو گا بلکہ انجوائے کیا ہو گا۔ ایک تو کوڑے کھانے والے مرد ہیں۔ دوسرا کوڑے مارنے والے طالبان نہیں تھے جو امریکہ کے لئے ناپسندیدہ ہیں اس سے پاکستان کی بدنامی کا پہلو بھی نکلتا تھا یہ ایک طرح کے واقعات ہیں تو ردعمل مختلف کیوں ہے۔ آئی جی پنجاب طارق سلیم ڈوگر نے فوری طور پر ایس ایچ او اور ڈی ایس پی کو معطل کر دیا ہے۔ طارق صاحب کے لئے میرے دل میں عزت ہے میں ان کے آئی جی بننے پر بہت خوش ہوا تھا۔ پہلے ان سے کبھی کبھی ملاقات ہو جاتی تھی۔ اب وہ بہت مصروف ہونگے مگر انہوںنے تھانہ کلچر تبدیل کرنے کے لئے کچھ نہیں کیا۔ شاید انہیں کچھ کرنے نہیں دیا گیا وہ خود اچھے دل والے آدمی ہیں۔ امانت اور استقامت والے پولیس افسر ہیں مگر تاریخ میں ان کا نام بھی نہیں ہو گا کسی آئی جی نے ایسا کام نہیں کیا کہ اسے یاد کیا جائے۔ وہ جب ایس پی اور ڈی آئی جی لاہور تھے تو آج سے بہت اچھے تھے ان کو کرنے کچھ نہیں دیا جاتا تو پھر وہ آئی جی کیوں بنے ہیں۔ یہ واردات ہر تھانے میں ہوتی ہے۔ ایک بار کسی ایک پولیس والے کو عبرت کا نشان بنا دیا گیا ہوتا تو پھر ایسا کبھی نہ ہوتا۔ ڈوگر صاحب اللہ کے دربار میں کس کس ظلم کا حساب دیں گے۔
چنیوٹ کے اس شرمناک اور توہین آمیز واقعہ کے بعد متعلقہ پولیس افسروں کو سرعام لٹا کر برہنہ کر کے کوڑے مروائے جاتے خود طارق سلیم ڈوگر اس نیک کام کی نگرانی کرتے۔ انہوں نے یہ مناظر ٹی وی چینلز پر دیکھے ہونگے تو پھر انکوائری کمیٹی کی رپورٹ کا انتظار کیسا اس کے علاوہ کسی تفتیش کی ضرورت ہے۔ وہ دل پر ہاتھ رکھ کر بتائیں کہ اس سے پہلے انہوں نے خود کئی پولیس ملازمین کو معطل کیا ہو گا۔ کیا وہ اب بھی ملازمت میں نہیں۔ ان میں سے کئی کی ترقی ہو گئی ہو گی۔ ایک جگہ سے معطل ہونے والے بحال ہو کے اس سے زیادہ مرغوب جگہ پر لگا دئیے جاتے ہیں۔ کارروائی رانا ثناءاللہ کی محض ایک بیان ہوتا ہے البتہ شہباز شریف نے پولیس کے خلاف کارروائی کے لئے ہدایات دی ہیں۔ یہ ہدایات وہ دیتے رہتے ہیں۔ وہ کئی جگہوں پر مظلوم لڑکیوں اور بے گناہ ستم رسیدوں کے گھر گئے ہیں یہ سب لوگ صرف اور صرف پولیس کی زیادتیوں کا شکار خواتین و حضرات ہی ہوتے ہیں۔ اس کے بعد کوئی خبر نہیں آتی کہ کسی کو انصاف ملا کہ نہیں ملا۔ یقیناً نہیں ملا ہو گا۔ اسی جگہ پر پھر اس سے بڑھ کر ظلم کی واردات ہوتی ہے اور اس میں کسی نہ کسی طرح پولیس والے ملوث ہوتے ہیں۔ یہ ظالموں کے ساتھی ہیں۔ کھلی کچہریوں میں 99 فیصد شکایتیں اور فریادیں پولیس والوں کے خلاف ہوتی ہیں۔ لوئر مڈل کلاس سے آئے ہوئے وردی پہن کر غریبوں پر ظلم کرتے ہیں کیا انہوں نے کبھی کسی امیر زادے یا وزیر کے بیٹے یا ایسے کسی نوجوان کے ساتھ زیادتی کا سوچا بھی ہے۔ برق گرتی ہے تو بے چارے مسلمانوں پر“ یہاں برق کا مطلب پنجاب پولیس ہے۔ تھانے، عقوبت خانے ہیں ان میں ایسے کمرے بھی ہیں جہاں معصوم عورتوں کے ساتھ زیادتی کی جاتی ہے۔
حافظ آباد میں چند دن پہلے پولیس والے یہی تماشا لگائے ہوئے تھے۔ ستم بالائے ستم یہ کہ عام لوگ انجوائے کر رہے ہیں۔ یہ بے غیرتی ہے اس توہین اور تشدد کا کوئی جواز نہیں۔ وہ لوگ کیا ہیں جو تھانوں کو آگ لگا دیتے ہیں یہ بھی کبھی ہو گا کہ ظالم پولیس والوں کو لوگ خود کیفرکردار تک پہنچا دیں گے۔ ڈیفنس تھانے میں ایسی ہی واردات کی گئی ہے۔ غالبا گیارہ جنوری کو ایک نوجوان کی چھترول کی گئی۔ پچھلے ایک ماہ کے دوران پنجاب پولیس کی یہ تیسری معرکہ آرائی ہے۔ پچھلے ایک سال کا حساب لگا لیں پھر کئی سالوں کا حساب لگائیں۔ پولیس افسران اور افسران تکبر اورتکدر میں ایک جیسے ہیں۔ یہ افسران بالا کہلاتے ہیں انہیں افسران تہہ و بالا بھی کہا جاتا ہے۔ تھانہ کلچر اور دفتری زیادتیوں کو بدلنے کا ایک ہی طریقہ ہے کہ افسرانہ کلچر تبدیل کیا جائے۔ افسران اور پولیس افسران ظالم اور کرپٹ ہیں۔ بیورو کریسی براکریسی ہے۔ انہوں نے کبھی کچھ بھی اچھا نہیں کیا۔ افسران کو کبھی معطل نہیں کیا گیا۔ انہیں صرف کچھ دیر کے لئے او ایس ڈی بنایا جاتا ہے۔ یعنی آفیسر آن سپیشل ڈیوٹی تو اس سے پہلے وہ کس طرح کی ڈیوٹی پر ہوتے ہیں ان کے اثاثوں کی جانچ پڑتال کے لئے کمشن بنایا جائے۔
سی سی پی او پرویز راٹھور کے لئے بھی میرے دل میں نرم گوشہ ہے۔ وہ دیہاتی مزاج کے دل والے آدمی ہیں۔ انہیں بھی پتہ ہوگا کہ تھانوں میں کیا ہوتا ہے۔ وہ جو کیمرے کی آنکھ میں اور قلم کی نوک پر نہیں آتا مگر ڈیفنس تھانے کے واقعے پر تو کوئی ایکشن لیں حافظ آباد کے لئے آر پی او ذوالفقار چیمہ سے گزارش کرنے کی ضرورت کیوں پیش آ رہی ہے۔ اغواءبرائے تاوان کی قیامت گوجرانوالہ میں طاری کرنے والے نتھو گورایہ کی نعش کو شہر بھر میں پھرایا گیا جو پنجاب پولیس کی تاریخ میں ایک کارنامہ ہے مگر کیا یہ بھی کارنامہ ہے جو حافظ آباد پولیس کے جوانوں نے سرعام چھترول کر کے انجام دیا۔ ملزم اور مظلوم میں فرق نہیں رہا۔ کیا چیمہ صاحب اپنی پولیس کی خبر بھی لیں گے؟۔ طارق سلیم ڈوگر نے اس موقع پر پولیس کے شہید جوانوں کو یاد کیا۔ ان کی قدر ہمارے دل میں بھی ہے مگر یہ موقعہ نہ تھا۔ میرے ایک کالم پر فوراً وہ اوکاڑہ پہنچے تھے ۔ ظالم پلسیوں کو جیل بھجوانے سے پہلے ان کی سرعام چھترول ضروری تھی۔ کیا یہ پولیس والے کیفر کردار تک پہنچائے جائیں گے۔ یقین نہیں آتا۔ لوگ صبر کریں گے اور انتظار کریں گے مگر طارق سلیم ڈوگر ریٹائر ہو جائیں گے۔

کوئٹہ میں صدر زرداری کے لئے روکی گئی ٹریفک میں رکشے کے اندر ایک عورت نے ایک بچے کو جنم دیا۔ الیکٹرانک میڈیا نے صدر زرداری کے خلاف پروپیگنڈا شروع کر دیا کسی نے پولیس والوں کی سفاکی اور بے رحمی پر بات نہیں کی۔ آئی جی پولیس سے کسی نے کچھ پوچھنے کی زحمت نہ کی۔ وہ شاید بات بھی ان کے ساتھ نہ کریں جن پولیس والوں نے مومن خان کی منت سماجت اور چیخ و پکار کی پرواہ نہ کی کیا انہیں صدر زرداری نے کہا تھا کہ ٹریفک کو سیکورٹی کے نام پر اس طرح خراب کرو اور لوگوں کے ذلت اور اذیت سے دوچار کرو۔ یہ پولیس والے بے نظیر بھٹو کے قتل کے دوران بھی موجود تھے۔ ان سے کسی نے کوئی سوال نہیں کیا اقوام متحدہ کی تفتیشی ٹیم نے ان سے کچھ نہیں پوچھا۔ یہ لوگ خلق خدا کو خواہ مخواہ ذلیل و خوار کرتے ہیں۔ ابھی تو صدر زرداری کا جہاز کوئٹہ ائرپورٹ پر اترا ہی نہیں تھا کہ ہر طرح کی ٹریفک بند کر دی گئی۔ وزیر اعلیٰ بلوچستان نے اس دردناک واقعے کی تحقیقات کا حکم نہیں دیا۔ اس نے تو اپنے بلوچ بچے کو کچھ نہیں دیا۔ کیا ٹریفک مخدوم گیلانی‘ شہباز شریف‘ سردار اسلم رئیسانی اور وغیرہ وغیرہ حکمرانوں کے لئے نہیں روکی جاتی۔ بچہ تو کسی بھی رکی ہوئی ٹریفک کے دوران پیدا ہو سکتا تھا۔ بچہ بچ بھی گیا۔ اسے انعام بھی مل گیا۔ اس کی بھی تعریف بھی کرو۔صدر زرداری نے بچے کے لئے گھر والوں کو پانچ لاکھ بھجوائے مگر کیا یہ بھی صدر زرداری کا قصور ہے کہ بچے کے گھر والوں کو صرف دس ہزار روپے دئیے گئے ہیں۔ باقی رقم خورد برد کر لی گئی ہے۔ اس کی انکوائری کون کرائے گا۔ کیا یہ بھی صدر زرداری کی ذمہ داری ہے۔ وزیر اعلیٰ بلوچستان سردار رئیسانی کا بھی کوئی کام ہے کہ نہیں۔ صدر زرداری نے جو کچھ کیا وہ کوئی دوسرا شاید نہ کر سکتا۔
وزیر اعظم نے صرف بیان دیا ہے اور وہ بھی صدر زرداری کی پوزیشن خراب کرنے کے لئے دیا ہے۔ اس نے آجکل صدر زرداری کی کھلم کھلا حمایت کرنا شروع کر رکھی ہے۔ وہ خفیہ طریقے سے مخالفت کرتے تھے تو بھی مقصد ایک ہی تھا اور مقصد یہ ہے کہ مجھے چیف ایگزیکٹو سمجھا جائے۔ انہیں اس وہم میں مبتلا کر دیا گیا ہے کہ آپ کی عزت صدر زرداری کی توہین میں پوشیدہ ہے۔ این آر او کے لئے عدالتی فیصلے پر انہوں نے برہمی کا اظہار کیا اور یہ مظاہرہ انہوں نے پہلی دفعہ کیا ہے۔ ججوں کی تعیناتی کے لئے انہوں نے جارحانہ انداز اختیار کیا اور پھر بغیر دعوت کے چیف جسٹس کی دعوت میں اپنے کئے کی معافی مانگ لی دوسرے دن چیف صاحب کی ساری باتیں مان لیں۔مگر کسی نے مخدوم صاحب کو کچھ نہ کہا اس کے لئے بھی صدر زرداری کو برابھلا کہا گیا اور یہی مخدوم گیلانی چاہتے تھے وہ شیخ رشید کے لئے پیپلز پارٹی کے کارکنوں کی حمایت کو بے اثر کرنے کے لئے ناشتے پر بغیر دعوت کے رائے ونڈ چلے گئے او ر یہ تاثر دیا کہ میں نے شیخ صاحب کو ہروایا ہے۔ نواز شریف اور شہباز شریف نے کھری کھری صدر زرداری کو سنائیں کہ شیخ رشید صدر زرداری کے امیدوار تھے۔ پیپلز پارٹی کو بھی شکست کے طعنے دئیے گئے مخدوم گیلانی کو کسی نے کچھ نہیں کہا۔ اب رکشے میں بچے کی پیدائش کو طنز میں اڑا دیا۔ بچے تو جہازوں میں بھی پیدا ہوتے ہیں۔ یہ جملہ نوائے وقت میں وحید حسین کے کالم کا عنوان ہے۔ اس نے وزیر اعظم کے بیان کو ماں بننے کے عمل میں عزت اور حیاءکے منافی قرار دیا ہے۔ اس کے بعد مخدوم گیلانی نے معافی مانگ لی ہے۔ سیاست میں معافی کلچر زیادہ عام ہو گیا ہے۔ ان لوگوں کو معافی مانگتے ہوئے شرم کیوں آئے کہ قول و فعل کے دوران بھی انہیں شرم نہیں آتی۔ یہ بھی انکشاف کرتے ہوئے کچھ محسوس نہیں کیا گیا کہ میری سالی ریل میں پیدا ہوئی تھی ریل میں پیدا ہونے والوں کے گھر میں اتنی ریل پیل نہیں ہوتی۔ ریلوے کے وزیر غلام احمد بلور نے بڑی بے دردی اور ڈھٹائی سے ریل کے حادثے میں کئی بچوں کی ہلاکت پر بیان دیا کہ ریل کے سامنے جو آئے گا وہ تو مرے گا۔ آئندہ بھی کوئی بچہ ریل کے سامنے آیا تو مرے گا۔ مخدوم گیلانی نے یہ محاورہ بھی مزاح پیدا کرنے کے لئے سنایا تھا جو سنا نہ گیا ”سالی آدھے گھر والی“ بچے کے حوالے سے جو باتیں جان بوجھ کر مخدوم گیلانی نے کیں اس کے لئے بھی میڈیا کے ایک حصے نے صدر زرداری کی کردار کشی کی۔ خوشنود علی خاں نے لکھا ہے کہ ”وزیر اعظم مخدوم گیلانی آئی جی بلوچستان کو SACK کرتے ایس ایس پی کوئٹہ ایس پی ٹریفک ڈی ایس پی ٹریفک اور وہ سارے لوگ جو مومن خان کی آہ و زاری کے باوجود ٹس سے مس نہ ہوئے۔ ان کو فارغ کرتے ۔بہت پہلے ٹریفک روکنے کا بھی کوئی جواز نہ تھا۔ ان سب کو آئی جی سمیت سزا ملنا چاہئے۔ صدر زرداری کی کردارکشی ہوتی رہی اور سارے انجوائے کرتے رہے۔ ورنہ صدر کو کیا معلوم کہ سیکورٹی کے نام پر یہ لوگ کیا کیا کرتے ہیں“ لاہور میں مخدوم گیلانی کے لئے پولیس اور ٹریفک پولیس والے گھنٹوں تک لوگوں کو روک دیتے ہیں مگر کبھی میڈیا نے مخدوم گیلانی اور شریف برداران کے لئے روکی گئی ٹریفک میں پھنسے لوگوں کے تاثرات نہیں دکھائے جاوید چودھری کو اس پر اعتراض ہے کہ بچے کا نام آصف زرداری کی مناسبت سے آصف خان کیوں رکھ دیا گیا ہے۔ اس کے بقول بچے کا نام رکشہ خان ہونا چاہئے۔ گزارش ہے کہ بچے کا نام پروٹوکول خان یا سکیورٹی خان رکھا جاتا تو زیادہ موزوں ہوتا کیا اتنے شور شرابے کے بعد وی آئی پی کلچر ختم ہو جائے گا۔ پروٹوکول کے نام پر ایک آدمی کے لئے چالیس پچاس گاڑیاں ایک ساتھ چلیں گی اور سیکورٹی کے نام پر ٹریفک روکی جائے گی اور لوگ کئی گھنٹوں تک ذلیل و خوار ہوں گے۔ میری بیٹی کی شادی پر مخدوم گیلانی آئے تھے ان کے ساتھ کوئی سکیورٹی نہ تھی۔ اب اتنی سکیورٹی کی کیا ضرورت ہے۔ صدر زرداری اور نوازشریف کے لئے توخطرہ ہے۔ مخدوم گیلانی اور شہباز شریف کے لئے کوئی خطرہ نہیں۔ یہ سکیورٹی کے نام پر پروٹوکول ہے۔

شکر ہے کہ ناظم کراچی مصطفیٰ کمال کے ساتھ ایم کیو ایم ہے، صرف کراچی میں بلدیاتی نظام کو خطرہ نہیں بلکہ سندھ میں بھی نہیں اور پاکستان میں بھی نہیں۔ مصطفیٰ کمال کی تعریف ہوتی ہے تو وہ الطاف حسین کا نام لیتا ہے۔ کراچی میں صورت حال بگڑتی ہے تو لوگ ایم کیو ایم کی طرف دیکھتے ہیں اور تعمیری کاموں کے لئے بھی نظر انہی کی طرف جاتی ہے، مگر وہ بھی مکمل طور پر غیر سیاسی نہ ہو سکے۔ عامر محمود کا تعلق اسلامی جمعیت طلبہ سے تھا اور ساری جماعت اسلامی آج کل اسلامی جمعیت کی قیادت پر مشتمل ہے، کئی لوگ جمعیت سے کسی اور جماعت میں چلے گئے۔ جاوید ہاشمی، احسن اقبال اور حنیف عباسی زیادہ تر لوگ مسلم لیگ ن میں گئے۔ اس سے مسلم لیگ ن کی حیثیت کا اندازہ ہو سکتا ہے جبکہ مسلم لیگ کا مزاج جماعت اسلامی والا نہیں ہے۔ اسلامی جمعیت طلبہ میں سٹوڈنٹ لیڈر کے لئے ناظم کا لفظ استعمال کیا جاتا ہے جب حافظ سلمان بٹ عامر محمود کے مقابلے میں ہار گئے تو وہ ان کے پاس گئے اور کہا کہ جناب میں لاہور کا ناظم بنا ہوں مگر میرے ناظم تو آپ ہیں۔ حافظ سلمان بٹ اسلامی جمعیت طلبہ کے ناظم تھے۔ عامر کے اندر کی مروت اور رواداری تھی ورنہ کون ہارے ہووں کے پاس جاتا ہے۔ شیخ رشید کے ہارنے پر شریف برادران نے جو کچھ کہا اور ان کے لوگوں نے جو زبان استعمال کی وہ مانسہرہ میں جیتنے والوں نے استعمال نہ کی تھی۔ مجھے پاکستان کے مختلف شہروں کے ناظمین سے کوئی تعارف نہیں، مجھے پشاور اور کوئٹہ کے ناظم کا نام بھی نہیں آتا، صرف دو ناظم مجھے یاد ہیں، اب تو وہ بھی ناظم نہیں، میں گئے ہووں کے لئے نرم گوشہ رکھتا ہوں۔ شریف برادران بھی جب یہاں نہ تھے تو میں ان کو یاد کرتا تھااب وہ یہاں ہیں اور بہت ہیں انہیں ابھی کسی کی ضرورت بھی نہیں۔
مصطفیٰ کمال نے بہت کام کراچی کے لئے کیا، پوری دنیا نے مانا ، دوست دشمن قائل ہوئے سب سے بڑی بات چیف جسٹس افتخار محمد چودھری کی ہے کہ انہوں نے کراچی میں تعمیر و ترقی کے لئے مصطفیٰ کمال کی تعریف کی جبکہ چیف جسٹس جب غیر فعال تھے تو کراچی میں داخل نہ ہونے دینے کے لئے مصطفیٰ کمال کی جماعت ایم کیو ایم پر الزام لگتا رہا۔ ہمارے ملک کی سیاست و حکومت الزام اور انعام کے درمیان لٹکتی رہتی ہے۔ وہ لوگ بہت کم ہیں جو الزام کو انعام بنا دیتے ہیں، کراچی میں جتنا کام ناظم کراچی نے کرایا ہے سیاستدانوں کے لئے پریشانی کا باعث ہے۔ لاہور میں عامر محمود نے بھی کام کیا ہے کچھ منصوبے اب مکمل ہو رہے ہیں یہ کام ناظم لاہور نے وزیراعلیٰ چودھری پرویز الٰہی کے ساتھ مل کر کئے اس میں کریڈٹ لینے اور ایک دوسرے پر بازی لینے کی بات بھی نہ تھی کچھ لوگوں میں کسی کے ساتھ مل کر کام کرنے کی توفیق ہی نہیں ہوتی وہ چاہتے ہیں کہ جو کچھ وہ کریں بس وہی کریں اور اس کے لئے تعریف ہو اور وہ بھی صرف ان کے حصے میں آئے، جو کچھ بھی ہو وہ ان کی مرضی اور اجازت سے ہو۔ اگرخود یا خودبخود کچھ بن جائے خواہ اس طرح بنے جس طرح وہ بنے تھے، وہ جو کچھ بھی کرے گا، غلط کرے گا، غیر جمہوری ہو گا اور کرپشن بھی صرف وہی کرے گا۔ کرپشن ناظمین نے بھی کی ہو گی وہ سیاستدانوں کی کرپشن سے بہرحال کم ہو گی مگر سیاستدان سمجھتے ہیں کہ ان کے علاوہ کوئی کرپشن نہ کرے کئی سیاستدانوں نے اسمبلی کی رکنیت سے استعفیٰ دے کے ناظم بننے کی کوشش کی۔ یہ سب کچھ ان کے خیال میں غیر سیاسی تھا، اب پھر بلدیاتی انتخابات سیاسی بنیادوں پر کرانے کا اعلان کیا گیا ہے۔ اس سے پہلے شہر کے میئر ہوتے تھے اور وہ سیاستدانوں کے ماتحت ہوتے تھے اور کوئی کام نہ کرتے تھے اچھے یا بُرے کام کرنے کے لئے سیاستدانوں سے اجازت کی ضرورت ہوتی ہے، کوئی آدمی اب ناظم بن کے مصطفیٰ کمال جیسا کام کراچی میں کرے گا تودیکھیں گے اس سے پہلے کراچی میں کیا کام ہوا؟ عامر محمود کے خلاف کوئی بات نہ ہوئی جب حکومت بدلی ہے تو ان کے خلاف بات شروع ہوئی سارے ناظموں کے خلاف بات ہونے لگی ہے جبکہ پیپلز پارٹی اور مسلم لیگ ن سے کبھی وابستہ لوگ ناظم تھے۔ ناظموں کو خواہ مخواہ مخالف کیمپوں میں دھکیل دیا گیا۔ بات گورنر ہاوس تک گئی اور پھر عدالتوں میں چلی گئی۔ محاذ آرائی کی سیاست کسی کے فائدے میں نہیں ہے مگر کچھ لوگ اس سے بھی فائدہ اٹھانا چاہتے ہیں۔ عامر محمود نے اس ساری لڑائی میں حصہ نہیں لیا۔
کراچی میں ٹریفک کے نظام کو جس طرح بہتر بنایا گیا وہ ایک چیلنج ہے کوئی دوسرا کوئی کام کر دکھائے گا تو بلدیاتی نظام کے لئے مخالفانہ بات میں کوئی وزن پیدا ہو گا اس سے پہلے بیورو کریسی نے پچاس برسوں میں کیا تیر مارا ہے۔ بیورو کریسی نے حکمرانوں اور سیاستدانوں سے مل کر کرپشن کی ہے اور کوئی تعمیری کام نہ کیا۔ اب پھر سب کچھ ان کے حوالے کیا جا رہا ہے۔ ناظم لوگوں کے ووٹوں سے منتخب ہوتے ہیں وہ کرپشن بھی کرتے ہوں گے مگر کچھ نہ کچھ تو اچھا بھی کریں گے کہ انہیں پھر ووٹوں کے لئے لوگوں کے پاس جانا ہوتا ہے۔ بیورو کریٹس تو کسی کے محتاج نہیں ہوتے کہ کسی کے سامنے جواب دہ ہوتے ہیں۔ سیاستدان ان سے بات کرنے میں ہر فقرہ سے پہلے بھی Sir کہتے ہیں کسی نظام کو ختم کرنے کی بجائے اس میں موجود خرابیاں اور کمیاں دور کرنا چاہئیں۔ مصطفیٰ کمال کو پوری دنیا میں تسلیم کیا گیا۔ عامر محمود کے لئے ملک بھر میں تعریف و تحسین کی گئی ایسے لوگوں سے فائدہ اٹھانا چاہیے۔