Archive for July 24th, 2009

ہلیری کلنٹن کو پاکستان کے خلاف باتیں بھارت میں نہیں کرنا چاہئے تھیں۔ امریکی پاکستان میں پاکستان کے خلاف باتیں کرتے ہیں۔ پاکستانی عوام کو دکھ ہوتا ہے۔ مگر وہ صبر کرتے ہیں۔ پاکستانی حکام امریکہ کی ہر بات کو اپنے لئے انعام سمجھتے ہیں۔ یہ باتیں امریکہ‘ یورپ اور بھارت سے سُن سُن کر ہمارے صبر کا پیمانہ لبریز ہو چکا ہے۔ بھارت میں یہ باتیں کرتے ہوئے امریکہ کو شرم آنی چاہئے۔ ہم امریکہ کے پرانے دوست ہیں۔ نئے دوست کے پاس یہ باتیں اچھا نہیں۔ پاکستان کا حال یہ ہے کہ ہم کرکٹ میچ ساری دنیا سے حتٰی کہ بنگلہ دیش سے بھی ہار جائیں مگر بھارت سے ہارنا ہمیں کسی صورت گوارا نہیں اور ہم نے بھارت کو کئی بار شکست سے دوچار کیا ہے۔ ہمارا ایٹم بم بھارت سے بہتر ہے۔ ہمارے میزائل‘ ہماری فوج‘ ہماری آئی ایس آئی‘ ہمارے سائنسدان اور ہمارے لوگ بھارت سے بہت آگے ہیں مگر ہمارے سیاستدان اور ہمارے حکمران بھارت کے تھلے لگے ہوئے ہیں۔ اور یہ امریکہ کی وجہ سے ہے وہ بھارت کو خطے کا لیڈر بنانا چاہتا ہے۔ اپنی طرح بھارت کو بھی پاکستان پر مسلط کرنا چاہتا ہے۔ بھارت کہتا ہے کہ یہ نہیں ہو سکتا جب تک پاکستان کے پاس ایٹم بم‘ پاک فوج اور آئی ایس آئی ہے۔ امریکہ یہ تینوں چیزیں برباد کرنا چاہتا ہے۔ ایٹم بم چھین لینا چاہتا ہے۔ پاک فوج کو سیاست میں گھسیٹ گھسیٹ کر بدنام کرنا چاہتا ہے اور اپنے لوگوں کے ساتھ لڑا لڑا کے ناکام کرنا چاہتا ہے اور آئی ایس آئی پر پابندی لگوانا چاہتا ہے۔ یہ کام پاکستانی حکمرانوں کی مدد کے بغیر نہیں ہو سکتا۔ مگر آہستہ آہستہ ہمارے حکمران اتنے بے حمیت اور نااہل ہوتے جا رہے ہیں کہ صورتحال بگڑتی جا رہی ہے۔ ہلیری نے کہا کہ نائن الیون کے ذمہ داران اب پاکستان میں ہیں۔ امریکہ نے بھی الزام لگا کے افغانستان پر حملہ کیا تھا۔ اس کا مطلب یہ ہے کہ امریکہ اب پاکستان پر حملہ کرنا چاہتا ہے۔ ڈرون حملے تو ہو رہے ہیں اور بم دھماکے امریکہ کی نگرانی میں ہوتے ہیں۔ اس کا نگران اس کام کے لئے اب بھارت ہے۔ امریکہ نے ویتنام میں بدنام اور ناکام ہو کے کمبوڈیا پر حملہ کر دیا تھا۔ وہاں وہ ذلیل و خوار ہوا۔ امریکہ کو ناکامی‘ بدنامی‘ ذلت اور خواری کی کوئی پرواہ نہیں۔ وہ ظالم ہے درندگی اور بربریت اس کی فطرت ہے۔ ظالم بزدل ہوتا ہے اور ایسے لوگوں کے پاس طاقت آ جائے تو شرمناک قیامت بن جاتی ہے۔ امریکہ افغانستان میں بُری طرح ناکام ہوا ہے۔ امریکی خود بھی یہ اعتراف کر رہے ہیں۔ صدر اوباما کا وزیر دفاع صدر بُش کا تحفہ ہے پاکستانی صدر‘ مش کی پالیسیوں کا تسلسل جاری ہے اور یہ بھی امریکہ کی مرضی سے ہو رہا ہے۔ رابرٹ گیٹس نے کہا کہ ہم افغانستان میں ہار چکے ہیں۔ وہاں شدید مشکلات ہیں مگر ایک اہم پیشرفت کی ضرورت ہے۔ وہ کیا ہے۔ وہ اپنے ایجنٹ طالبان کی شکل میں پاکستان میں دھکیل رہا ہے۔ تھکی ہوئی امریکی اور اتحادی فوج اب بیزار ہو چکی ہے۔ امریکی عوام بپھر رہے ہیں۔ وہ امریکی حکام کو کھا جائیں گے۔ صدر بش سب کچھ بگاڑ کے ایک طرف ہو گیا ہے۔ اب صدر اوبامہ کو اس کے حصے کی بھی بے عزتی کا ہار گلے میں ڈالنا ہے۔ لفظ ہار پر غور کریں۔ اگر امریکہ پاکستان میں نئی جنگ کا مزید آغاز کرنے والا ہے۔ پاکستان میں یہ جنگ داخل کرنے کے باوجود وہ پریشان ہے۔ اُس کا کچھ بھی باقی نہیں رہے گا۔ کچھ بھی یہاں زندہ نہیں بچے گا۔ وہ پاکستان میں جتنا ذلیل و خوار ہو گا۔ ساری دنیا میں اپنی ساری ذلت اور خواری ملا کے بھی اس کے برابر نہ ہو سکے گی۔ پاکستان امریکہ کا قبرستان بنے گا۔ ہلیری کلنٹن تو ایل کے ایڈوانی اور ایم ایس کرشنا سے بھی زیادہ ڈھیٹ ہو کر کہہ رہی ہے کہ ممبئی حملوں کے ملزمان کو کٹہرے میں لایا جائے۔ بھارتی کٹہرے اور امریکی کٹہرے میں کوئی فرق نہیں رہا۔ یہ بات ہلیری جیسی عورت کو زیب نہیں دیتی۔ وہ اپنی سطح سے بہت نیچے آ گئی ہے۔ پروفیسر حافظ سعید کے خلاف کارروائی خود پاکستان کے حق میں ہے۔ اب پاکستان کو یہ سمجھانا بھی امریکی وزیر خارجہ کی ذمہ داری ہے۔ امریکہ جو کچھ عافیہ صدیقی کے ساتھ کر رہا ہے۔ اس پر ہلیری کو غور کرنے کا موقعہ نہیں ملا۔
پاکستانی حکومت کو باضابطہ احتجاج کرنا چاہئے۔ امریکی سفیر کو دفتر خارجہ بلائو اور اس سے پوچھو کہ امریکہ کا غیر سفارتی رویہ اب غیر انسانی اور غیر اخلاقی ہوتا جا رہا ہے۔ ہلیری کا شوہر کلنٹن بھی بھارت آیا تھا اور اس نے ایٹمی معاہدہ کیا تھا۔ وہ تو پاکستانی حکمرانوں کی منت سماجت سے چند لمحوں کے لئے پاکستان آ گیا تھا مگر اس نے مشرف سے ہاتھ نہیں ملایا تھا۔ پھر اسی مشرف کو 9 سال تک امریکہ لاڈ پیار سے استعمال کرتا رہا۔ یہ سب کچھ اب جو پاکستان میں ہو رہا ہے اس کا ذمہ دار صدر مشرف ہے اور امریکہ ہے۔ ہلیری بھی چند لمحوں کے لئے پاکستان آ گئی ہوتی۔ بے شک صدر زرداری کو نہ ملتی مگر پاکستانی حکومت کی شرم تو رکھتی۔ کسی امریکی نے بھول کر بھی پاکستان میں بھارت کے خلاف بات نہیں کی کہیں بھی کبھی نہیں کی۔ مگر پاکستان جو امریکہ کے لئے بربادی اور بدنامی کے آخری کنارے پر پہنچ گیا ہے۔ اس کے خلاف ہر کہیں ہر وقت باتیں کی جاتی ہیں۔ امریکی میڈیا کا رویہ بھی ایسا ہی ہے۔ ہلیری کی باتوں سے دکھ ہوا ہے پاکستانی لیڈی ڈیانا کے بعد سب سے زیادہ پسندیدگی ہلیری کے لئے رکھتے ہیں۔ انہیں صدر اوباما کے صدر ہونے کی خوشی ہے مگر جب ہلیری کے ساتھ اس کا مقابلہ تھا تو بہت پاکستانی ہلیری کے ساتھ تھے۔ اب دونوں نے ہمیں بہت مایوس کیا ہے۔ بش سفید اور رائس کالی۔ اب اوباما کالا اور ہلیری سفید ہے۔ کچھ فرق نہیں ان چاروں میں۔ امریکی حکمران پاکستانی حکمرانوں جیسے تو نہیں کہ اپنے ملک و قوم کی عزت اور مفاد کو قربان کر دیں۔ مگر امریکی حکام پاکستانی عوام کو کیوں نظرانداز کر رہے ہیں۔ یہ بات انہیں بھی بالآخر ذلیل کر دے گی۔ ان کا حشر بھی پاکستانی حکام جیسا ہو گا۔ یہ حشر بھارتی حکام کا بھی ہونے والا ہے۔ امریکہ جس کا دوست ہوا۔ اُسے ذلیل کیا۔ ہلیری کی بے مروتی اور بے پروائی نے مجھے پریشان کر دیا ہے۔ جب صدر کلنٹن نے خوبصورت اور شاندار ہلیری کو نظرانداز کر کے مونیکا سے عشق و عاشقی کی پینگیں بڑھائیں امریکی عوام صدر کلنٹن کے خلاف ہوئے۔ وہ نسبتاً اچھا صدر تھا۔ اس نے عالم اسلام کو خاک و خون کی دلدل نہیں بنایا۔ امریکہ ایک ’’سیکس فری‘‘ یعنی آزاد خیال بلکہ جنسی طور پر بہت بے غیرتی کی حد تک لبرل معاشرہ ہے۔ لبرل ہونا چاہئے مگر ہر بات کی ایک حد ہوتی ہے۔ امریکیوں نے کہا کہ ہمارے صدر کو ایک باوقار اور شاندار آدمی ہونا چاہئے۔ تب ہلیری نے ایک مشرقی بیوی کی طرح ضبط و تحمل کا ثبوت دیا۔ اس نے اپنے بے وفا شوہر کو برباد اور بدنام نہ ہونے دیا۔ اس کا ذرا سا غم و غصہ سب کچھ خاک میں ملا دیتا۔ اس کی یہ ادا پسند آئی۔ اب بھی اُسے ایک اچھی عورت کا سا سیاسی سٹائل اختیار کرنا چاہئے۔ جو اس کے لائف سٹائل سے ملتا جلتا ہے۔ اُسے کنڈولیزا رائس سے تو مختلف ہونا چاہئے۔ ہمارے خودغرض مفاد پرست اور بے حمیت حکمران تو احتجاج نہیں کریں گے مگر وہ خود پاکستانیوں سے معافی مانگے۔ پاکستانی لوگ امریکی حکام کو اچھا نہیں سمجھتے مگر ہلیری کے لئے ان کا خیال ابھی تک اچھا ہے۔